[台中食食食] 重遊清境系列 少女下午茶時間 老英格蘭莊園 中伏度極高

事隔幾年再次踏足清境，除左想探下班綿羊同呼吸新鮮空氣之外，仲有要試下一間人氣極高的民宿餐廳。老英格蘭莊園大家應該都唔陌生，係清境最受歡迎既民宿之一。佢外表係成座英式古堡，充滿古典氣派，聳立在清境山頭，霸氣盡現。不過房間價格都幾令人卻步，由$2800/晚起，呢個價錢住民宿未免太奢侈。所以對一班唔想訂房但又想親近一下古堡既少女黎講，去民宿餐廳－維吉諾餐廳（Virginal Restaurant）食返個下午茶都似乎係個好選擇。（似乎咋）

維吉諾餐廳唔接受訂位，不過平日去都唔算多人，唔需要等位。入餐廳會經過一個小花園，都係唯一開放俾非住客參觀的地方，民宿其他地方都去唔到。餐廳佈置都係走英式古典風格，裝飾都幾有心思，係幾有英式格調，環境都唔錯。


下午茶每位台幣$500再加一，即港幣$138，比起香港酒店黎講平好多。茶具同點心架都有陣古典味，食物上枱個時其實都唔覺得有異樣，仲覺得好靚呀好開心影好多相。頭兩層係甜點，最底層係鬆餅蛋糕類，另外有個焦糖布丁，同埋一壺花茶。


但一開始食就覺得唔對路。先食最底層鬆餅蛋糕麵包，賣相都正常，但幾件野一係冇味啦，一係凍啦，一係太硬......不過都唔算係好難食既。


之後睇清楚少少甜品，賣相非常古怪，中間個疑似啫喱既物體，我朋友話覺得好似酒精磋手液......好啦我都照試下啦，係一pat好似水既質地但又水唔曬凝固左少少既不知名東西，味道就係水加少少甜味其實都唔知咩味既野。隔離有兩個用柑做主打的生果撻，我真係第一次見生果撻上面係柑，唔緊要啦人一世物一世咩都試下啦，er......唔夾囉只可以話。乖，下次用返士多啤梨奇異果好冇？仲有隔離個兩舊綠色醬朱古力，你以為係綠茶？你世界太美好了，但其實我真係食唔到係咩味，因為佢根本冇味，總之唔係綠茶啦。仲有個舊紅莓蛋糕仔，個音符真係好唔靚仔，味道係樓下麵包店幾蚊個種西餅，而佢只係得人地3份1舊，你呢舊野成本其實駛唔駛$1？

到最上層，繼續係酒精磋手液，兩粒正常味但唔特別好食的迷你macaron，同埋，我都想問下隔離呢兩舊係乜野？入面係豆類東西仲要有醬痴住......賣相非常唔討好，所以我冇食。


焦糖布丁我平時好鍾意食，但呢個質感太水，味道一般，勉強可以話正常。總之成個下午茶我係一路食一路問點解可以甘核突、呢舊乜野黎、點解可以甘難食......丫，杯荼幾好飲架，這個是真心讚的！雖然呢個下午茶比香港平，但香港真係好食好多架。

其實餐廳除左下午茶都仲有早、午、晚餐，非住客都可以黎食，可能只係下午茶難食而其他OK都未定，不過我真係唔會再黎。至於好多人可能只係貪佢個景而黎，食物其實冇咩所謂，我都覺得唔值呀，因為個景......OK啦，不至於要為呢個景而作賤自己個胃囉。台灣其實仲有一間走英式古典風格既餐廳，叫古典玫瑰園，台北、台中都有，我未食過，不過聽講質素唔錯，我下次都會試下。少女們，唔好再貪人外表，俾靚仔呃啦，有豐富的內涵同美好的內心才是永久的啊～

老英格蘭莊園
地址：台灣南投縣仁愛鄉大同村壽亭巷20-3號
交通：台中火車站搭南投客運去清境架車龍莊站落車
下午茶時間：11:30 - 16:00
價格：每位台幣$500再加一
網址：http://www.theoldengland.com/（其實我都話左唔推介大家黎，點解我仲要俾資料大家......只能說我人真的好盡責）