[福岡景點] 10分鐘走進避世小島 入秋限定 能古島波斯菊花海

初踏福岡，計劃行程的時候發現其實唔多野玩，市區好細，博多同天神係購物區，鍾意跑景點可以去太宰府、福岡塔、門司港、柳川。但我對郊外小島情有獨鐘，所以除左行左一陣購物區外，其他以上景點一概冇去，反而去左一個旅遊書都好少介紹的島仔 - 能古島，享受悠閒小島風情。


能古島算係一個同市區好接近的島仔，搭地鐵去到姪浜站，北門出口搭98號巴士約15分鐘去到姪浜渡船口（即係碼頭），就可以用自動售票機買飛搭船去能古島啦，來回460yen。


船期大約一個鐘一班，有時半個鐘。呢架船有名，叫花之能古，單車同私家車都可以上船。船上有室內都有露天位，欣賞下海景吹下海風，大約10分鐘就到喇！


一落船就見到有架接駁巴士，佢就係去今次目的地- Island park的巴士啦。由碼頭去到公園大約15分鐘。公園入場費1000yen，多數人黎能古島都係為呢個公園而黎，睇張門票就知呢個公園最大賣點係咩啦。


冇錯，Island Park最吸引遊客就係呢一片花海啦！有花又有海景，係名符其實的花海呀！！！係咪好靚呀？唔同季節都會有唔同花睇，今次我10月中黎，盛開的就係大波斯菊，有紫色、粉紅色、白色，成個畫面都好粉嫩好靚呀！春天會有櫻花同油菜花、夏天有杜鵑花同向日葵、冬天有水仙同山茶花，大家可以揀唔同季節黎呀。

Island Park成個環境都係一個超級寫意的花園，除左花海之外周圍都種左好多樹同唔同的花，有一大片草地，又可以見到海，黎野餐都唔錯架。


而我鍾意呢度仲因為呢度有好多兔仔呀！！！Island Park養左超過30隻兔仔，只要俾100yen買個扭蛋兔糧，就可以同兔仔近距離接觸，餵飼佢地啦。佢地超級超級可愛呀，只要你拎住兔糧，就會成群衝埋黎食，見到佢地真係超治癒架！！！好得意呀！！！我個心完全融化。哈哈。話說我以前屋企都有養兔仔，係全白色個種，好得意架佢，所以我係超級鍾意兔子呢種動物！


而呢度有一d係比較冷漠既，佢地會成群結隊默默食草......但淨係見到佢地發呆個樣已經覺得好可愛啦！


兔仔附近有山羊區，都可以買草餵飼，但我對你地冇興趣啦，bye！（明明去清境個陣都捉住d羊唔放，而家有兔仔就廢事理d羊......）


Island Park仲有幾間特色小店，賣下手信、藝術品，有間cafe，仲可以學燒陶瓷添呀！另外仲有d小玩意，咩滑草呀、踩高橋個d，要另外收費。

公園唔大，行下影下相hea下大約兩個幾鐘就行完，可以在入口搭返頭先架接駁巴士出返碼頭搭船。走個時見到好靚好靚的日落！！！個天橙色架，好正！！！好有feel der！


落船發現有巴士直接返博多/天神，可以唔駛再轉地鐵。其實黎都有巴士直接黎，不過我懶得搵邊度上車，就地鐵再轉巴士。回程選擇一程巴士會比較簡單。


如果想遠離市區享受下郊外寧靜，不妨黎一趟能古島啊！
交通詳情及時間表：LINK