[九州食食食] 沿海佐伯市 人氣地道壽司店推介 + 即拆即食新鮮海膽 精選

介紹完景點，又點少得美食呢？去日本，海鮮、魚生、壽司都是必須的！因此九州佐伯市就更加要放入行程，因為呢個沿海城市正正係盛產海鮮，仲要附近海域水流較急，所以魚都特別活躍，肉質就更爽口而又脂肪比例平均，無論口感定鮮味都好高質！

特別介紹呢間名為鮨割烹第三金波的小店，係佐伯市好出名，好多當地人都鍾意去食。由佐伯JR站過黎只需10-15分鐘車程。老闆係個非常有趣活潑既叔叔，佢見到我手機殻係阿美，就同我講佢老婆同個女都好鍾意阿美，又話佢自己似姆明，所以佢老婆鍾意佢。哈哈哈，所以我地都叫佢moomin 。我地影相佢就會擺pose，好得意。佢一路同我地介紹好多關於佐伯出產海鮮既野，後尾從街坊口中得知老闆爸爸曾經都係壽司師傅，仲係佐伯市最好食的壽司店！老闆都承傳了爸爸的廚藝，太厲害了！好喜歡呢種小店既氣氛，溫馨又開心。


呢個壽司set款款都好新鮮，非常好食，包括秋刀魚、鯛魚、蝦、鰻魚、海膽等等，魚生勁鮮甜，都係用當造漁獲做食材。重點係價錢好合理，只係3000yen，即係港幣$210，10件壽司，真係物超所值。最驚喜係海膽壽司，因為海膽好甜！同香港平時食個d差好遠呀，香港係點都有少少苦味，呢度完全冇，好正！仲有天婦羅都唔錯架。


鮨割烹第三金波
地址：大分縣 佐伯市 内町 3-28
Facebook（日文）：https://www.facebook.com/kinpano3

講到海膽，不得不提佐伯市丸二水產，位於蒲江海域附近，好多新鮮海產都係由丸二水產直送各地。呢度有即拆即食海膽體驗，教你拆從蒲江新鮮撈到的海膽。其實只需要用一個特製的拑，插入海膽中間，再放開，海膽就會爆開兩邊。之後就洗拆出黎的海膽肉，洗乾淨再放返入一個海膽殼擺得靚靚地，就可以食啦！（其實中間一路拆都忍唔住偷食哈哈哈）因為真係新鮮從海裡撈上黎，所以好重海水味，鮮味十足，同樣都係甜甜地，唔苦架！


每次體驗會即拆10幾隻細海膽，仲有一隻大馬糞海膽。呢個咁珍貴既體驗竟然只需1620yen，即係港幣110幾蚊，實在太太太平啦！平時呢個價錢只係食到　2-3隻海膽份量，但呢度係10幾隻呢！強烈推介大家黎玩同食。除左拆海膽，仲有得即拆即食伊勢龍蝦，或者淨係食海鮮都得，仲有民宿住添！由佐伯JR站開車過黎，大約一個鐘。之後仲可以坐船出島去深島玩貓，上船碼頭離丸二水產只係20分鐘車程。記住預約呀。

丸二水產

地址：876-2302 大分縣佐伯市蒲江大字西野浦2643
網站（日文）： http://marunisuisan.com/index.html

九州佐伯觀光官網（暫時只有日文）：http://saiki-kankou.com/