[九州住宿] 佐伯市特色住宿體驗 住進當地農民的家 感受熱情又溫馨招待

少女旅行日記 於 11/10/2018 發表 收藏文章
去旅行成日都希望可以多D機會同當地人交流,識新朋友,今次去九州佐伯市就有一個好開心的住宿體驗,就係入住當地農民的家,同農家主人一齊晚飯,感受一下住當地人屋企的溫馨氣氛。

佐伯市有大約20間農家住宿,我今次就入住其中一間農家一晚,主人係佐藤夫婦,佢地以前係務農為生,住既地方周圍好有大自然氣息,大宅前面有河流,附近都係山,空氣特別清新。不過唔好以為住郊區會好落後,兩層的住宅裡面好大,設施好齊全,在我心目中係豪宅。有三間客房,兩間係塌塌米房,一間有床。塌塌米房有露台,環境好舒適。我特別鍾意個浴室,有浴缸同埋花灑淋浴位置,係分開的,符合日本人要先淋浴乾淨再浸浴的習慣。


我地去到既時間係黃昏,佐藤太太同我地介紹下間屋,就開始準備食物,佢預備左超級多野食招呼我地,仲要叫埋朋友黎幫手預備,勁有心呀!成枱都係食物,真係好豐富!魚生同壽司係外賣,中間好大盤壽司係佐伯特產,飯上面係類似菇,都幾特別。其他都係佐藤太太同朋友一齊整,隻蟹係佢地自己落河捉架,就係佢地屋企前面條河,保證新鮮,好好味,仲教我拆蟹添!另外個關東煮佢又教我一齊整麵條,等我都可以參與下,當然都係好味啦哈哈。


一路食飯一路聽佐藤太太分享左好多好多野,佢真係非常親切友善,又有活力,成日講笑。佢仲俾結婚相我地睇,佢同佐藤先生結婚超過50年了,仲好恩愛,好幸福啊!好彩同行的朋友阿貝識日文可以幫手翻譯下,因為我係完全唔識既,所以我會建議識少少日文既人黎住,就可以交流得好d啦。後尾佐藤太太突然醒起有個翻譯app,佢講一句日文,個app就可以顯示中文,我就可以睇,知道佢講咩,好搞笑。佢又幫我較定水浸浴,嗚太感動了!真係好溫馨。而佐藤先生係比較文靜同內斂,雖然少說話,但都係好友善成日笑。


訓醒第二朝佐藤太太又為我地預備好早餐,和式早餐好精緻好多野食,可以媲美出面餐廳。早餐既米都係佢地自己種,好軟綿,唔小心食左兩碗添。


走的時候都有點不捨,因為佐藤太太實在太好了~~呢種住宿體驗真係獨一無二,比住酒店有趣太多了,我地過左好開心好難忘的一晚!農家住宿一點都不貴,連埋早、晚餐都只係7000 Yen左右,港幣500蚊咋!大部份農家都有接待外國人的經驗,部份仲會提供農務體驗,但真的建議識日文的人去,有興趣的話可以參考下呢個網:https://www.visit-oita.jp/green_tourism/ (得日文)

九州佐伯觀光官網(暫時只有日文):http://saiki-kankou.com/

留言


請按此登錄後留言。未成為會員? 立即註冊
    快捷鍵:←
    快捷鍵:→