【黑盒揭祕系列－黑盒解剖】 精選

🛬每次飛機發生空難，新聞報導總會提到「黑盒」🕋呢個詞語。黑盒，即係飛航紀錄器，一架飛機上嘅飛航記錄器都包含兩個唔同嘅部份，分別係飛行資料記錄器(FDR)同駕駛艙通話記錄器(CVR)。好多嘅空難發生之後，調查人員都只可以靠飛航記錄器搵出飛機失事之前機內系統嘅運作情況。因為空難通常發生喺一瞬間，機師同全部乘客都同時遇難令到證詞無跡可尋，調查失事原因會有好大嘅困難，而「黑盒」🕋就可以向人們提供飛機失事瞬間同失事前一段時間入面，所有飛機嘅飛行狀況、機上設備嘅工作情況等；而駕駛艙通話記錄器(CVR)就可以幫調查人員根據機上人員嘅各種對話分析事故原因，以便對事故作出正確嘅結論。👨‍✈👩🏻‍✈

🎛先講講飛行資料記錄器(FDR)，可以紀錄飛機最近25個鐘入面嘅飛行資料，好似壓力高度、空速、磁航向、加速度、經過時間、發動機動力及襟翼的位置等等。當飛機喺空中，FDR就會開始記錄，而且手握機上數百條人命嘅機組人員都冇任何控制FDR嘅能力，亦都冇辦法刪除記錄。當然，確保飛行資料記錄器(FDR)正常運作亦都係機師起飛前嘅慣常動作。
🎙駕駛艙通話記錄器(CVR) 除咗紀錄機師與航管人員對話之外，仲記錄機艙入面正副機師之間嘅對話、機組員對乘客嘅廣播同駕駛艙入面嘅所有聲頻，飛機失事之前兩個鐘嘅紀錄都會被完整保存，而且會持續發出訊號📶，記錄器所提供嘅電力足夠發出信號30日。

講到呢度，或者大家可能會清楚多少少飛機黑盒🕋喺航行中扮演嘅角色。心水清嘅讀者應該唔難睇出，黑盒只係一個發生事故先能夠發揮用途嘅機器，難聽啲講就係「幾百人嘅死亡證明書同遺言」。或者呢一刻您覺得科技好發達，但事實上Sam哥我覺得現今科技未算太發達，至少仲有好大嘅發展空間（當你知道大部分航空管制塔依然要透過機師飛經Checkpoint來了解航行去向，你就知道航空科技並未有刊陳出新）。就以2014年馬航MH370失蹤事件嚟講，飛機飛抵印度洋上空之後就失去聯絡，甚至到四年後嘅今日都未搵返肇事客機嘅黑盒🕋。係90%嘅海面空域冇雷達覆蓋嘅情況之下🗺，飛機只要飛到遠離陸地的海面，就冇其他方法探測嘅辦法。所以，我哋可以睇到其實有太多航行上嘅問題，仲係冇辦法靠現今運行嘅設備嚟解決。🤷🏻‍♂
講到底，企喺機師們嘅立場上，黑盒🕋嘅作用極其量只係「事後孔明」，係公司考量成本同必要性之下，機師同航管人員就自然成為咗航空安全嘅最後壁壘。機師要具備嘅唔只係操作同起飛前嘅準備，良好嘅應變能力🕺以至心態💓先可以將「失事」變成「故事」，希望他朝有日我可以成為一位寫「故事」嘅機師。👨‍✈
-----------------------
Facebook: Sam哥飛機駕駛艙
Instagram: Samgorflight