雲南中伏記 - 麗江導遊係解放軍????

露露的自由行 於 15/02/2020 發表 收藏文章
續上集,小編同好朋友紙巾因為係網上見到個叫小曼,自稱當地導遊,於是我地就報內地團參加,以為係請一個導遊兼司機車我地去玩。於是我地懷住興奮心情乘坐高鐵,終於黎到麗江火車站。

「你們知道嗎?其實雲南接近金三角,所以這裹以前都是製毒,運毒的地方。」小輝說。

呢位係我地係麗江既導遊兼司機,小輝。

佢係我地到達麗江前,已經主動聯絡我。要求我地提前話比佢知,我地乘搭的火車班次,方便佢可以提早到火車站接我地。

同時我亦都問今晚酒店既名同地址,了解下酒店基本資料。佢就話,呢間叫古日新酒店。

我既火車未埋站,我已經問,佢到左未。而佢影左張麗江火車站既相比我,表示佢已經一早到達。於是我地亦都十分安心。

由於大家係message 入面已經互相形容過自己既衣著,所以大家好快就可以辨認對方。

小輝係一個大約三十歲既納西族人(納西族屬於雲南少數文族之一,所講既語言為納西語),身穿迷彩套裝,一對淺啡色既boots。最後我地黎到一架吉普車前,佢就招乎我地上去坐。佢比較活潑,上車之後就開始同我地講解麗江歷史,又介紹本土語言,同埋講自己既威水史。

「我們每個人都有一個英雄的夢,所以香港電影遺禍左一代人,那些年的黑社會電影真的教壞了人,幸好我被家人送到部隊裹訓練。」小輝說。

「我呢原本在部隊裹,是頂尖的。我的槍法是很準確的。可以說是,百發百中。所以被選中了去雲南主要的緝毒部隊。」小輝面上掛住一個得意既笑容,口若懸河地講佢既威水史。

「可是,有一次,我們在叢林裹,正準備去追捕大毒梟既時候,中了敵人的埋伏。所以腳部中左槍。自那次我的腳就不再靈活。所以就退役了,現在做了一個導遊,以後還會在老家那邊開一間客棧,帶人出行山。」小輝說。

嗯,其實係咪有少少矛盾,一方面又話自己係出類拔粹,一方面又話自己中左埋伏所以退役。甘點解吾去軍校做教練?又或者做後勤,而要轉行?奇怪。。。。。。

所以只有我既好朋友同佢講野。我一句都無回應,因為我覺得佢吹水成份比較多。

大約30 分鐘車程,我地黎到一個小區。

由車窗望出去,見到一座座三層既小平房一幢幢連接住。每一幢小平房前都有一條短橋。短橋下係一條流動既小溪。而小溪就由街頭流到街尾。每一幢小平房都不約而同,一片漆黑。只係偶然會見到街角一間小食店有兩三棧燈,聚左三兩個人係到食宵夜。

街上只有稀疏既街燈照明,小輝係呢一個區徘徊左大約十五分鐘。因為佢自己都直言,吾記得酒店係邊到。當時我就已經開始變得機警,拎電話,開google map,然後搜尋「古日新酒店」。發現前面其實就係酒店。

去到酒店,小輝一再叮囑,吾好直接飲當地既水。飲自己水樽既水,避免飲完出現水土不服既症狀。

但係由香港飛到昆明,再由昆明到麗江,用左一日時間。中間,除左飛機餐,我地都無食過野。

所以當佢講既成為耳邊風,我地入左酒店房,就即刻搵個熱水煲煲熱水。再係行理搵左兩個杯麵出黎,食飽先訓得著。

第二朝,我地食左一個酒店自助早餐。

早餐係酒店既餐廳食,而位置在於同一層,行幾步就到。我以為餐廳屬於室內,我發現,我太年輕了。餐廳係一個平台隔離,因為無任何通風裝置,只依靠呢道門吹風入黎,寒風刺骨。

我由細到大,去過吾同地方旅行,大大小小中學交流團,以至青少年制服團體既交流營。但從未試過,眾多種食物中,竟然一樣都吾太岩食。食物大多都係冷盤,例如酸辣土豆絲、酸辣豬耳、酸辣木耳同酸辣青瓜等等。。。。。。,而熱食,會出煙既只有一窩南瓜粥。

於是,我只係食左一碗南瓜粥,作為麗江第一餐。


待續。。。。。。。。。

如果喜歡我們的文章,請即分享到︰

標籤: 雲南  導遊  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→