係上海仲要食無蟹粉嘅小籠包?有無攪錯?

香港人在上海 於 26/10/2015 發表 收藏文章
嚟上海旅遊或者出差,喺呢度搵小籠包食差唔多係每個人嘅第一必然選擇。咁一街到尾都係小籠包店,係有限嘅時間,究竟要食邊間好呢?浪費錢事小,浪費個胃事大,而且啲小籠包由幾蚊到成百蚊一籠,等我介紹三間舖仔你去試吓!

未介紹之前,記住一件事,忘記鼎泰豐,除非你認為你係鬼佬!

推介一:「南翔饅頭店」

如果你跟團或者俾人逼你一定要去上海城隍廟,而且你好鬼想試下小籠包。大部分人都會叫你去食「南翔饅頭店」。但係你通常見到個招牌同一條人龍,真係好鬼多人。吓!咁點算啊!排隊啊?!唔係吓?醒個小貼士俾你,要排隊都唔好去地面果度排隊,行上二樓,果度都係食小籠包,但係啲貨色係同地面果啲完全唔同,雖然如此,但喺味道就一般啦。比香港嘅好食,但係天外總有天。

記住要上二樓

推介二:「佳家湯包」

十年前於河南南路的路邊小店,排隊唔係攞號碼,係攞啤牌,果時都已經排隊排到傻。時至今日,搬左去黃河路開總店,仲有喺商場開左啲店仔,但係味道一定無總店咁好食。聽聞過話譚校長講過佢喺全世界最好食嘅小籠包,有無咁勁?!真係有㗎,以前囉!宜家都勁,可以話係全上海最好食嘅,但係質素真係無以前好。一定要試嘅係蟹粉鮮肉,28 蚊 12 隻,呢款你幾時嚟,只要佢開門都有個食。如果想試啲其它嘢,就要早啲起身,十點左右到舖,你會發現多好多選擇,仲平好多添!我嘅建議係可以試下蛋黃鮮肉+蟹粉鮮肉,可能你最後唔鬼知邊隻係蛋黃,邊隻係蟹粉!湯就睇你自己心情,都係味精湯,過下癮就試個蛋皮湯,唔係加支玻璃樽汽水都幾正㗎!

一籠12隻,有時候好彩,仲見到啲蟹黃


推介三:「屋有鮮湯包」

呢個係小弟嘅個人推介,因為呢度係上海近郊嘅一個古鎮叫召稼樓,我諗連旅行團都未必會嚟!其實呢個古鎮喺上海周邊嚟講,都係比較細嘅,不過,就有好多乾貨買,質素其實都唔錯,價錢就自己講啦!講返間湯包店,老闆娘係上海城隍廟綠波廊以前個點心師傅,咁去過日本交流添!店舖門口就係㕑房,包小籠包嘅地方,旁邊有張枱專門用嚟拆蟹肉,保證新鮮。價格比較貴,一籠都係得6隻。不過每隻湯包比較大,亦比較足料;配一碗牛筋湯或者魚丸湯就一流。如果仲唔夠,整碗蟹粉小餛飩,保證你喺香港一定食唔到!

手工係好啲!夠專業
有專門的薑醋
蟹粉小餛飩唔係度度有

之後仲會介紹上海美食同好玩嘅同大家分享,鍾意嘅點LIKE我嘅FB專頁-香港人在上海https://www.facebook.com/HKGinSHG?ref=aymt_homepage_panel。謝丫儂!

留言


請按此登錄後留言。未成為會員? 立即註冊
    快捷鍵:←
    快捷鍵:→