【食在上海】大城小店-上海隱藏篇-長腳湯麵

香港人在上海 於 04/11/2015 發表 收藏文章
每個城市都有著名美食ICON,米芝蓮三星啊,乜鬼名廚師啊!當然呢啲餐廳會有一定嘅水準,用一啲你估唔到嘅材料,用一啲你又估唔到嘅手法,做啲你又估佢唔到嘅菜式。有時候,最簡單嘅菜式先係最考人嘅。平凡的嘢食,用心用堅持咁努力為街坊、食客做出一份心意,呢啲先至大城市中嘅一份難得嘅人情味。

九點後見到個牌就走入去食嘢啦

座落係黃浦區肇周路合肥路交界嘅長腳湯麵,淨係睇佢嗰名你會估佢係坐喺啲長枱啊,啲麵好鬼長啊之類,先會有一個咁嘅名,原來個店名竟然喺關老板有關,仲要係外型。因為老板身高近六尺,擁有一對長腿,因而得名,奇鬼怪。

想食到佢嘅手藝都唔係咁易,要先睇天氣,落雨唔開,老板心情唔靚,唔開。不過都係以前嘅事,一年前,老板生病,店都關左一段時間,仲有傳聞話瓜咗,真係大吉利事。病左係事實,好番之後都唔咁大牌啦,唔係太大雨,通常都會開舖,係晚上九點之後,做到賣完啲麵為止。
雖然係小店,長腳老板非常愛乾淨,好整潔

店裡只賣一樣嘢,青菜牛肉麵,豉油湯底。盛惠二十元正,味道分不辣、微辣、中辣。點解無大辣,老板娘知你係第一次嚟,就唔會俾大辣你食。食得辣嘅朋友,先試試中辣,過到關先殺BOSS吧!如果你想加嘢嘅話都可以嘅,加肉,加菜,加麵都得,每樣五蚊。

老板煮麵有一定程序,每碗都一樣,先加水放鑊,放麵放去煮,之後落牛肉、辣汁,再煮一陣,落菜,加味精,喺個碗放豬油同鹽,之後將煮好嘅湯麵倒入嗰碗入面便完成。日復一日,碗復一碗。之後老板娘送入去俾你食,食之前會同你講句「攪勻先好食」嘅上海話。其實要你將啲豬油香散發出嚟,真係成間舖都聞到。

唔好睇佢都唔起眼,連美國美食家波登都嚟過試,拍左六個鐘,但一句訪問都無做!真係好鬼有型!
波登條片翻拍自屋企電視,效果係差啲啲

留言


請按此登錄後留言。未成為會員? 立即註冊
    快捷鍵:←
    快捷鍵:→