【懷孕分享】公立醫院走佬袋分享 （伊利沙伯醫院）

於懷孕期多次進出醫院產前病房，大概都對「走佬袋」要放啲咩有概念。
因為公立醫院提供的儲物空間不多，我希望「走佬袋」越輕巧越好，無謂帶太多唔等駛的東西去醫院。（同埋帶太多嘢會俾姑娘話！！）

要幾時準備走佬袋？


以我個人經驗，走佬袋真係越早準備越好，大概4、5個月開始準備吧！

走路袋應該要分兩個，一個係in case要產前入院用（個人用品為主），一個產後用。

懷孕期間如果touch wood 有任何情況（肚痛、見紅、胎兒活動減少......等等等），立即拎袋出發去醫院。最重要係不用在醫院遙控另一半幫你喺屋企揾或出街買（你都知拿／買錯機會很大吧！）。

我產前的走佬袋裡面就有：
1. 拖鞋 
2. 毛巾 (中碼浴巾) 
3. 肚紋油
4. 充電寶
5. 眼罩
6.耳塞 （病房半夜監察器咇咇咇響+隔離床鼻鼾好嘈）7. 個人用品
8. 少量零食
9. 廁紙


而我入院催生個走佬袋裡面有（上圖右上角起）：

1. 安睡褲（比用產婦衛生巾同網褲方便）2. 露營沖洗器<- 無用過
3. 頭髮乾洗粉
4. 拖鞋
5. 口罩
6. 眼罩
7. 保溫瓶（醫院有提供熱水壺，我用嚟焗炒米茶）
8. 零食／乾糧 （comfort food為主）
9. 毛巾 (中碼浴巾) 
10. 孕婦／媽媽奶粉 （我帶試用裝去）
11. lotion、牙刷、護膚品
12. 乳頭膏（餵母乳嘅時候有損傷用）
13. 濕紙巾 （消毒用、BB換片用）
14. 紙巾
15. 金縷梅清潔墊（美國朋友介紹、敷傷口用）

除咗圖入面嘅嘢，我仲有帶：充電寶
初生尿片（我帶咗一包32條）

總結／心得：

我唔係啲傳統人，生完落得床已經掂「生水」，洗手掂「生水」外，我去完廁所都直接用花灑沖身，無用到沖洗瓶。沖完個熱水涼感覺超好！但水一定要夠熱同埋盡快抹乾身。


住院6日無洗過頭，只係用乾洗粉噴下。

除咗生完醫院包嗰條產婦衛生巾外，我之後就用安睡褲。未落得床嗰陣，醫院嘅姐姐都好樂意幫手換安睡褲。不過有聽過其他醫院唔俾用，所以唔係QE生BB嘅媽媽要問清楚醫院。

生完產後病房啲姑娘會全天候每隔一陣入嚟指導你點樣餵人奶，而且亦鼓勵媽媽多啲同bb skin to skin，所以幾乎成日都係袒胸 Bra都唔使帶。

金縷梅清潔墊每次去完廁所放係乾淨嘅安睡褲入面敷傷口，涼浸浸好舒服，同時可以舒緩及幫助修復傷口。


唔使帶床墊， QE有提供。


 谷奶或餵奶嗰時有機會會整到心口一撻濕咗。我見其他媽媽唔係好在意，但我自己就覺得件衫濕笠笠好唔舒服。建議帶埋乳墊入院，貼係病人衫度，保持上身乾爽。