【食在上海】上海必選的四間道地口味餐廳(二)

香港人在上海 於 28/10/2015 發表 收藏文章
上海菜嘅濃油赤醬未必人人受得嚟,但係你受得的話,真係有好多好嘅選擇。比起粵菜,上海菜雖然無多款式,又無咁仔細,但係用料選擇都係好講究。尤其做海鮮嘅餸,唔新鮮嘅佢地通常都唔會太用。你見佢地食大閘蟹就知啦!以下推介果兩間餐廳都係喺市中心嘅淮海中路附近,如果你經開可以試試,但都係要排隊等位,三十分鐘就係必然,做足心理準備嘅係,間舖啲老闆都係好寸,過咗號就真係要重新排過隊。小心!

推介三:玲瓏酒家

在陝西南路嘅玲瓏酒家,可以話係上海餐廳中的寸王之王。老板話唔訂位,唔等你,你想食都未必一定俾你食。但係你坐底左又真係食到啲幾正嘅上海餸。最推介嘅喺熗河蝦,即係醉蝦。新鮮跳吓跳吓嘅蝦,加花鵰酒,沉個十分鐘,見到啲蝦唔郁就可以食啦。酒味同啲蝦味結合得好正,雖然膽細啲嘅會覺得幾恐怖,但係一生人試一次都值得。另外,紅燒豆腐小黃魚同腐乳通菜都係推介,雖然話腐乳通菜係香港都有得食,但係呢度用紅腐乳,個味仲香啲啲,本地人必選嘅菜式啊!


推介四:蘭亭餐廳

餐廳就係新天地嘅旁邊,由朝到晚都要排隊。比起玲瓏,蘭亭嘅服務比較好,也比較客氣。係等位嘅時候,老闆都會俾個MENU你點餸先,等你一入到去坐低就有得食,其實就唔想浪費佢哋嘅時間。菜單上嘅餸同以前果幾間都大同小異,但有一道餸叫雞骨醬就係獨一無二嘅;雖然話係雞骨醬,但係入面係無骨嘅,視覺上都係一堆醬,好似無乜特別,但食落都會FEEL到醬汁同雞肉味嘅結合,算係特式。其它選擇就有跑蛋,椒鹽排條等,水準都差唔多,鍾意試乜都可以。食完行去新天地都唔使5分鐘。雖然宜家新天地都唔係乜嘢泡點,搵間BAR飲杯嘢都係幾過癮嘅!

標籤: 食在上海  小店  上海菜  道地  

留言


請按此登錄後留言。未成為會員? 立即註冊
    快捷鍵:←
    快捷鍵:→