飛機餐唔岩食? 空姐有辦法!

小菲菲空姐日記 於 21/07/2016 發表 收藏文章
去旅行對香港人黎講已經十分普遍
每兩三個月就去一次台灣、日本、韓國
每半年又去一次澳洲、歐洲、美國
更何況而家廉航選擇多又經常推出平價機票
去旅行成為一樣每年必須既消閒活動
但大家去得多旅行,食得多飛機餐都會厭啦!
咁如果飛機餐真係唔岩食既話可以點?
今次就等空姐教路,俾D意見你啦!

1. 預訂特別餐
其實除左普通既飛機餐外, 我公司係有十幾款特別餐俾乘客預訂架! 例如: 兒童餐、印度素食餐、無牛肉餐、低卡路里餐等, 呢D特別餐係為有特別需要既乘客而設既,而有需要特別餐既乘客要係航班預定啟航時間最少24小時前提出有關要求! 不過其實無實際迫切需要食特別餐既乘客都一樣可以預訂特別餐既, 因為公司唔需要乘客係訂餐時提供任何證明文件。 我都見過有大人訂左兒童餐自己食, 所以乘客只要覺得特別餐比較岩自己口味既都可以訂架!

2. 自備食物
乘客係有權帶自己既食物上飛機食架! 可以係自己既住家食物, 又可以係餐廳外賣或者便利店熟食, 亦可以係乾糧零食等。以我所見, 強國人係呢方面比較醒目, 佢地好多時都會自備食物上飛機, 瓜子、水果、飯盒咩都有! 有次見到有個強國大媽係度食緊燒乳豬, 我咁岩企係佢隔離真係香到流晒口水! 不過要提醒下大家, 根據我公司既政策, 基於食物衛生同安全, 空姐係唔可以幫乘客雪藏或翻熱任何野包括食物, 所以大家都係買D唔洗雪既食物, 同埋上飛機後或飛機起飛後就趁熱食左D食物佢啦! 飛長途機就做好兩手準備, 帶定足夠既乾糧零食或者水果啦!

3. 食飽先上飛機
說真的, 飛機餐預先整好左咁耐, 雪住保存再運上飛機翻熱俾乘客, 真係落左一定既防腐劑, 而且多油多鹽唔會健康得去邊, 如果大家上機前有時間坐低食返餐豐富既先上飛機, 相信係最好不過, 而且一定多選擇, 用料新鮮, 煮法多元化又健康好多! 如果日本上機, 食返轉壽司同刺身先上機咪仲好過食飛機餐! 係韓國上機, 食多轉部隊鍋或者韓式燒肉係咪開心過食飛機餐先? 就算長途機既話, 都可以食少餐無營養既飛機餐呀! 總之地面上既餐廳食物或者屋企既住家飯係點都有營養過飛機上面既飛機餐! 飛機餐都係少食為妙啦!

識飲識食既大家下次搭飛機去旅行記住對自己個肚好D
為左令自己既旅程有一個愉快既開始或結尾做足準備啦!
希望大家去旅行既每一餐都食得好, 食得飽!

更多小菲菲空姐嘅日常,請Like FB: 小菲菲空姐日記
歡迎合作邀約

如果喜歡我們的文章,請即分享到︰

標籤: CX  空姐  飛機餐  特別餐  飲食  自備食物  旅行  

留言

會員
我要評論
請按此登錄後留言。未成為會員? 立即註冊
  • 哈哈生活
    哈哈生活 於 22/07/2016 評論 NO. 1

    感恩 :p

快捷鍵:←
快捷鍵:→